During exam preparation, Class 7 Malayalam Kerala Padavali Question Paper Set 2 guide students properly.
Class 7 Malayalam Kerala Padavali Model Question Paper Set 2
സമയം : 2 മണിക്കൂർ 15 മിനിറ്റ്
നിർദേശങ്ങൾ
- മൂല്യനിർണ്ണയ പ്രവർത്തനങ്ങൾ ആരംഭിക്കുന്നതിനു മുമ്പ് പതിനഞ്ചു മിനിട്ട് സമാശ്വാസ സമയമാണ്. ഈ സമയം ചോദ്യങ്ങൾ നന്നായി വായിച്ചു മനസ്സിലാക്കണം.
- ആറു ചോദ്യങ്ങൾക്ക് ഉത്തരമെഴുതിയാൽ മതി. എല്ലാ ഉപചോദ്യങ്ങൾക്കും ഉത്തരം എഴുതണം.
- രണ്ടു പ്രവർത്തനങ്ങൾ നൽകിയിട്ടുള്ള ചോദ്യങ്ങളിൽ ഒന്നിനു മാത്രം ഉത്തരമെഴുതിയാൽ മതി.
Question 1.
വായിക്കാം എഴുതാം.
ഗാന്ധിജി, നെഹ്റു, നേതാജി, ബഹദൂർഷാ, താന്തിയാതോപ്പി, ഝാൻസി റാണി, മംഗൽപാണ്ഡെ തുടങ്ങി നിരവധി ദേശാഭിമാനികൾ ഇന്ത്യൻ സ്വാതന്ത്യത്തിനു വേണ്ടി സമരം ചെയ്തിട്ടുണ്ട്. എന്നാൽ സ്വാതന്ത്ര്യദാഹികളുടെ, പ്രത്യേകിച്ച് യുവതലമുറയുടെ വീരാരാധനയ്ക്ക് പാത്രമായി നിൽക്കുന്ന ഒരു വിപ്ലവനായകനാണ് ഭഗത് സിംഗ്.
പഞ്ചാബിലെ ലായപ്പൂർ ജില്ലയിൽ 1907 സെപ്റ്റംബർ മാസത്തിലാണ് ഭഗത് സിംഗ് ജനിച്ചത്. സർദാർ കിഷൻ സിംഗും വിദ്യാവതിയുമായിരുന്നു മാതാപിതാക്കൾ. ബാല്യകാലത്തു കൂട്ടുകാർ കളിച്ചുനടക്കുമ്പോൾ ബ്രിട്ടീഷുകാരെ ഈ രാജ്യത്തുനിന്ന് കെട്ടുകെട്ടിക്കുന്നതിനെക്കുറിച്ചു മാത്രമായിരുന്നു ആ കുട്ടിയുടെ ചിന്ത. 1926ൽ നൗജവാൻ ഭാരത് സഭ രൂപീകരിച്ചു. ചന്ദ്രശേഖർ ആസാദായിരുന്നു അതിനു നേതൃത്വം നൽകിയത്. പഞ്ചാബിലെ ജാലിയൻ വാലാബാഗിൽ 1919ൽ നടന്ന നടന്ന കൂട്ടക്കൊല ഭഗത്തിന്റെ മനസിനെ വല്ലാതെ വേദനിപ്പിച്ചു. ജനറൽ ഡയർ എന്ന പട്ടാളമേധാവിയുടെ നേതൃത്വത്തിൽ ഇരുപതിനായിരം വരുന്ന നിസ്സഹായരായ ജനക്കൂട്ടത്തിനു നേർക്ക് വെടിയുണ്ടകൾ തീരുന്നതുവരെ നിറയൊഴിച്ചപ്പോൾ അവിടെ മരിച്ചുവീണത് ആയിരത്തി അഞ്ഞൂറിൽപ്പരം ഭാരത മക്കളായിരുന്നു. 1931 മാർച്ച് 23-ന് ലാഹോർ ഗൂഢാലോചനാ കേസിൽ പ്രതിയാക്കി ബ്രിട്ടീഷുകാർ ഭഗത് സിംഗിനെ തൂക്കിക്കൊന്നു.
A. യുവതലമുറയുടെ വീരാരാധനയ്ക്ക് പാത്രമായ വിപ്ലവനായകൻ ആര്?
(a) ഗാന്ധിജി
(b) ഭഗത് സിംഗ്
(c) നേതാജി സുഭാഷ് ചന്ദ്രബോസ്
(d) മംഗൽ പാണ്ഡെ
Answer:
(b) ഭഗത് സിംഗ്
B. നൗജവാൻ ഭാരത് സഭയുടെ നേതാവ് ആര്?
(a) ഭഗത് സിംഗ്
(b) ചന്ദ്രശേഖർ ആസാദ്
(c) സുഭാഷ് ചന്ദ്രബോസ്
(d) ഗാന്ധിജി
Answer:
(b) ചന്ദ്രശേഖർ ആസാദ്
C. 1919ൽ നടന്ന ജാലിയൻ വാലാബാഗ് കൂട്ടക്കൊലയ്ക്ക് ഉത്തരവിട്ട പട്ടാളമേധാവി ആര്?
(a) ജനറൽ ഡയർ
(b) ജനറൽ ഹെസ്റ്റിങ്സ്
(c) ലോഡ് കർസൺ
(d) ലാലാ ലജ്പത്റായ്
Answer:
(a) ജനറൽ ഡയർ
D. ബാല്യത്തിൽ കൂട്ടുകാർ കളിച്ചുനടക്കുമ്പോൾ ഭഗത് സിംഗിന്റെ ചിന്ത എന്തായിരുന്നു?
(a). പഠനം മുന്നോട്ട് കൊണ്ടുപോകുക
(b) ബ്രിട്ടീഷുകാരെ ഈ രാജ്യത്തുനിന്ന് കെട്ടുകെട്ടിക്കുക.
(c) കർഷകരെ സഹായിക്കുക
(d) രാഷ്ട്രീയത്തിലേർപ്പെടുക
Answer:
(b) ബ്രിട്ടീഷുകാരെ ഈ രാജ്യത്തുനിന്ന് കെട്ടുകെട്ടിക്കുക.
Question 2.
a) ഔചിത്യം വിശദീകരിക്കുക.
ടിവി ഭാര്യയോട് സംസാരിച്ചുകൊണ്ടിരുന്നു
ഈ മെയിലുകൾ തുടരെത്തുടരെ വർത്തമാനം പറഞ്ഞു കൊണ്ടേയിരുന്നു
മൊബൈൽ നിർത്താതെ ചിലച്ചു കൊണ്ടിരുന്നു.
ഈ വരികളുടെ ഔചിത്യം വിശദമാക്കുക.
Answer:
ഔചിത്യം
ഈ വരികൾ കഥയുടെ ആശയവുമായി ചേർന്ന് സൈബർ ലോകത്തിന്റെ ആഘാതവും കുടുംബാന്തരീക്ഷത്തിലെ വിദൂരതയും വ്യക്തമാക്കുന്നുവെന്നതാണ് അവയുടെ ഔചിത്യം.
ഇതിലൂടെ ഇന്നത്തെ മനുഷ്യജീവിതം സൈബർ ലോകത്തിന്റെയും ഇലക്ട്രോണിക് മാധ്യമങ്ങളുടെയും പിടിയിലായി, കുടുംബാംഗങ്ങൾ തമ്മിലുള്ള നേരിട്ടുള്ള ആശയവിനിമയം നഷ്ടപ്പെട്ടിരിക്കുന്നു എന്ന സത്യാവസ്ഥയാണ് എഴുത്തുകാരൻ ഉദ്ദേശിക്കുന്നത്.
b) കണ്ടമാനം ചെലവാക്കി കളയാം. ഒരു വിലയില്ലായ്മ ഉണ്ട് പലർക്കും. ഇവിടെ വിലയില്ലാതായത് എന്ത്?
1. വെള്ളം
2. പണം
3. വാക്ക്
4. സത്യം
Answer:
3. വാക്ക്
c) പ്രസ്താവന ശരിയോ തെറ്റോ.
ഓട്ട മത്സരത്തിൽ അലി മൂന്നാം സ്ഥാനമാണ് ആഗ്രഹിച്ചത്.
A. പൂർണ്ണമായും ശരി
B. പൂർണ്ണമായും തെറ്റ്
C. ഭാഗികമായി ശരി
D. മൂന്നാം സ്ഥാനക്കാർക്കുള്ള ഷൂസ് ആണ് ആഗ്രഹിച്ചത്
Answer:
D. മൂന്നാം സ്ഥാനക്കാർക്കുള്ള ഷൂസ് ആണ് ആഗ്രഹിച്ചത്
ചുവടെക്കൊടുത്ത 34, 3B എന്നീ രണ്ട് ചോദ്യങ്ങളിൽ ഏതെങ്കിലും ഒന്നിനു മാത്രം ഉത്തരമെഴുതുക.
Question 3.
(A) വിശകലന കുറിപ്പ്
“വിട്ടയയ്ക്കുക കൂട്ടിൽ നിന്നെന്നെ, ഞാ
നൊട്ടു വാനിൽ പറന്നുനടക്കട്ടെ. (ബാലാമണിയമ്മ)
“സ്വാതന്ത്ര്യംതന്നെയമൃതം
സ്വാതന്ത്ര്യംതന്നെ ജീവിതം
പാരതന്ത്ര്യം മാനികൾക്ക്
മൃതിയെക്കാൾ ഭയാനകം. (കുമാരനാശാൻ)
പില്ലുവിന്റെ മനസ്സിലെ കിളി
അശാന്തനായിരുന്നു.
“മനസ്സിലെ കിളി’ എന്ന കഥ, മുകളിൽക്കൊടുത്ത കവിതാശകലങ്ങൾ എന്നിവ വിശകലനം ചെയ്ത് കുറിപ്പെഴുതുക
Answer:
ബാലാമണിയമ്മ തന്റെ കവിതയിൽ “വിട്ടയയ്ക്കുക കൂട്ടിൽനിന്നെന്നെ, ഞാനൊന്നു വാനിൽ പറന്നുനടക്കട്ടെ എന്ന് പറഞ്ഞത് ഒരു പക്ഷിയുടെ ശബ്ദം മാത്രമല്ല, മനുഷ്യന്റെ ആത്മാവിന്റെ ആഗ്രഹവുമാണ്. ജീവജാലങ്ങൾക്ക് സ്വാതന്ത്ര്യം വേണം; കൂട്ടിലടച്ചാൽ അവ ജീവിക്കുന്നില്ല, വെറും നിലനിൽപ്പ് മാത്രമേ ഉണ്ടാകൂ. അതേപോലെ, കുമാരനാശാൻ വ്യക്തമാക്കുന്നതാണ്. “സ്വാതന്ത്ര്യം തന്നെയാണ് അമൃതം, പാരതന്ത്ര്യം മരണത്തെക്കാൾ ഭയാനകം. മനുഷ്യനും മറ്റു ജീവജാലങ്ങൾക്കും ഒരുപോലെ തന്നെ സ്വാതന്ത്ര്യം നഷ്ടപ്പെടുമ്പോൾ ജീവന്റെ അർത്ഥം നഷ്ടപ്പെടുന്നു.
ബിമലേന്ദ്ര ചക്രവർത്തിയുടെ മനസ്സിലെ കിളി’ എന്ന കഥയും ഈ ആശയവുമായി ഏകോപിപ്പിക്കുന്നു. പില്ലുവിന്റെ മനസ്സിലെ കിളി അശാന്തമായത്, അവൻ കണ്ട മൈന ചങ്ങലയിൽ പെട്ടു വലയുന്നതിനാലാണ്. ജീവജാലങ്ങൾക്കുള്ള സങ്കടം തിരിച്ചറിയാനും അവരെ മോചിപ്പിക്കാനും കഴിയുന്നത് യഥാർത്ഥ മാനുഷിക മൂല്യങ്ങൾ വളർന്ന കുട്ടിയുടെ മനസ്സിലാണ്. മൈനയെ വിടുതൽ നൽകുമ്പോൾ മാത്രമാണ് പിവിന് സന്തോഷം അനുഭവിക്കാൻ കഴിഞ്ഞത്. സ്വാതന്ത്ര്യത്തിന്റെ മഹത്വമാണ് എല്ലാ സന്ദർഭങ്ങളിലും ഉയർന്നുനിൽക്കുന്നത്.
അല്ലെങ്കിൽ
(B) പ്രതികരണകുറിപ്പ് എഴുതുക.
“കിളി അയാളോട് സംസാരിക്കുന്നു’ എന്ന കഥയിലെ നായകൻ ആധുനിക സാങ്കേതികവിദ്യയോട് മുഖം തിരിഞ്ഞു നിൽക്കുന്ന വ്യക്തിയാണ്.
ഈ പ്രസ്താവനയോട് നിങ്ങളുടെ പ്രതികരണം വ്യക്തമാക്കി കുറിപ്പെഴുതുക.
Answer:
പ്രതികരണക്കുറിപ്പ്
“കിളി അയാളോട് സംസാരിക്കുന്നു’ എന്ന കഥയിൽ നായകൻ നേരിട്ട് അനുഭവിക്കുന്ന അവസ്ഥ നമ്മുടെ കാലഘട്ടത്തിലെ വലിയൊരു യാഥാർത്ഥ്യത്തെ വെളിപ്പെടുത്തുന്നു. ആശയവിനിമയ സാധ്യതകൾ സൈബർലോകം അനവധി തുറന്നു തന്നിട്ടുണ്ടെങ്കിലും, അത് മനുഷ്യരുടെ ആത്മബന്ധങ്ങളെ അകറ്റിമാറ്റുന്ന അവസ്ഥ സൃഷ്ടിച്ചിരിക്കുന്നു. ഭാര്യ, മകൻ, മകൾ എന്നിവർ ഓരോരുത്തരും യന്ത്രങ്ങളുമായി മാത്രം ബന്ധപ്പെടുമ്പോൾ നായകൻ ഏകാന്തതയിൽ വീഴുന്നു.
ഇത്തരം സാഹചര്യത്തിലാണ് നായകൻ പ്രകൃതിയിലേക്കു തിരിഞ്ഞുനിൽക്കുന്നത്. കുടുംബത്തിൽ നിന്ന് അകലുമ്പോഴും പ്രകൃതി തന്നെ ആശ്വാസം നൽകി കൂട്ടിരിക്കുന്നു എന്ന അനുഭവമാണ് “കിളി അയാളോട് സംസാരിക്കുന്നു’ എന്ന രംഗം നമ്മിലേക്ക് കൈമാറുന്നത്. അതായത്, നായകൻ ആധുനിക സാങ്കേതികവിദ്യയുടെ അമിതമായ ഉപയോഗത്തോട് വിമുഖനായിരിക്കുകയാണ്. അദ്ദേഹം തിരഞ്ഞെടുത്തത് പ്രകൃതിയുമായുള്ള സംവാദമാണ്.
ഈ കഥ നമ്മെ പഠിപ്പിക്കുന്നത്, സൈബർ ലോകത്തെ മുഴുവനായി തള്ളിക്കളയാതെ, അതിനെ വിവേക ത്തോടെ ഉപയോഗിക്കുകയും, യഥാർത്ഥ മനുഷ്യബന്ധങ്ങൾക്കും പ്രകൃതിയുമായി ബന്ധപ്പെടുന്നതിനും പ്രാധാന്യം നൽകുകയും ചെയ്യണം എന്നതാണ്.
ചുവടെ കൊടുത്ത 44, 4B എന്നീ രണ്ടു ചോദ്യങ്ങളിൽ ഏതെങ്കിലും ഒന്നിനു മാത്രം ഉത്തരമെഴുതുക.
Question 4.
(A) ആസ്വാദന കുറിപ്പ്
തളിരും മലരും തരുപ്പടർപ്പും
തണലും തണുവണിപ്പുൽപ്പരപ്പും.
കളകളം പെയ്തുപെയ്തങ്ങുമിങ്ങും
ഇളകിപ്പറക്കുന്ന പക്ഷികളും
പരിമൃദു കല്ലോല വീണ മീട്ടി
പതറിപ്പതഞ്ഞുപോം ചോലകളും
ഒരു നല്ല ചിത്രം വരച്ച പോലെ
വരിവരി നിൽക്കുന്ന കുന്നുകളും
പരശത സസ്യവിതാനിതമാം
പല പല താഴ്വരത്തോപ്പുകളും
പവിഴക്കതിർക്കുലച്ചാർത്തണിഞ്ഞ
പരിചെഴും നെൽപാടവീഥികളും
ഇടയന്റെ പാട്ടിലലിഞ്ഞൊഴുകും
തടിനിയും താമരപ്പൊയ്കകളും
ഇവയെല്ലാമാവെറും ഗ്രാമരംഗം
ഭുവനൈക സ്വർഗമായ്ത്തീർത്തിരുന്നു…..
ചങ്ങമ്പുഴ
കാവ്യഭംഗിയും പ്രയോഗ ഭംഗിയും വിശകലനം ചെയ്ത് ആസ്വാദനം തയ്യാറാക്കുക.
Answer:
ആസ്വാദനക്കുറിപ്പ്
കൊടുത്തിരിക്കുന്ന വരികളിൽ കവി ഗ്രാമരംഗത്തിന്റെ സൗന്ദര്യവും സമൃദ്ധിയും അതിശയകരമായി വരച്ചു കാണിച്ചിരിക്കുന്നു. തളിരും മലരും തരുപ്പടർപ്പും പച്ചപ്പാർന്ന പുൽ പരപ്പുകളും എല്ലാം ചേർന്ന് പ്രകൃതിയുടെ മനോഹാരിത നിറഞ്ഞൊരു ദൃശ്യലോകമാണ് സൃഷ്ടിക്കുന്നത്. പക്ഷികളുടെ കള കള നാദവും,
വീണ മീട്ടും പോലെയുള്ള ഒഴുക്കും താമരപ്പൊയ്കയുടെ സൗന്ദര്യവും, വരിയായി നിൽക്കുന്ന ചെറു കുന്നുകളും, നെൽ കതിർ പാടങ്ങളും, ഇടയന്റെ പാട്ടും ചേർന്ന് ഗ്രാമജീവിതത്തിന്റെ സുന്ദരസങ്കല്പം സൃഷ്ടിക്കുന്നു.
ഈ ചിത്രീകരണം വായനക്കാരനെ ഗ്രാമത്തിന്റെ ഭംഗിയിലേക്ക് ആകർഷിക്കുന്നു. പ്രകൃതിയുമായി ഇഴുകിയ കൃഷിസമൃദ്ധമായ ഗ്രാമം, കവിയുടെ കാഴ്ചപ്പാടിൽ, ഭൂമിയിലെ ഒരു സ്വർഗ്ഗമായി ഉയർന്നിരിക്കുന്നു. കവിതയിൽ ചിത്രീകരിച്ചിരിക്കുന്ന ഓരോ പ്രകൃതി ഘടകവും ജീവിതത്തിന്റെ സമാധാനവും സൗന്ദര്യവും പ്രതിപാദിക്കുന്നു. അതിനാൽ ഈ വരികൾ പ്രകൃതി സ്നേഹത്തെയും ഗ്രാമീണ ജീവിതത്തിലെ ലാളിത്യസൗന്ദര്യത്തെയും ഉയർത്തിക്കാട്ടുന്നവയാണ്.
അല്ലെങ്കിൽ
(B) വിവരണം തയ്യാറാക്കുക
കുമ്മാട്ടിയുടെ വരവിനെ വർണിച്ചിരിക്കുന്ന മുത്തശ്ശി കഥയിലൂടെ എന്ന കവിത ഭാഗം വായിച്ചല്ലോ, കുമ്മാട്ടി എന്ന പാഠഭാഗത്തിലെ ആശയം കൂടി പരിഗണിച്ച് കുമ്മാട്ടിയെ കുറിച്ച് ഒരു വർണ്ണന തയ്യാറാക്കുക.
Answer:
കുമ്മാട്ടിയുടെ വർണ്ണന
ഓണാഘോഷത്തോടൊപ്പം ഗ്രാമങ്ങളിൽ കുട്ടികളും ചെറുപ്പക്കാരും അവതരിപ്പിക്കുന്ന പ്രധാന ജനകീയകലാരൂപമാണ് കുമ്മാട്ടി. പാർപ്പടകപ്പുല്ലുകൾ കൊണ്ട് ശരീരം പൊതിഞ്ഞും, വർണ്ണാഭമായ മുഖാവരണങ്ങൾ കെട്ടിയും, വില്ലുകൊട്ടി താളത്തിൽ കളിക്കുന്നതാണ് ഇതിന്റെ പ്രത്യേകത. ഹനുമാൻ, കൃഷ്ണൻ, പന്നി, തള്ള എന്നിവരാണ് മുഖ്യ കഥാപാത്രങ്ങൾ.
ആർപ്പുവിളികളോടും പാട്ടുകളോടും കൂടിയുള്ള പ്രകടനം ഗ്രാമങ്ങളിലെല്ലാം ഉത്സവചൈതന്യം പകരുന്നു.
കാവാലം നാരായണപ്പണിക്കരുടെ മുത്തശ്ശിക്കഥയിലൂടെ എന്ന കവിതയിൽ കുമ്മാട്ടിയുടെ വരവ് അത്ഭുതകരമായ ഭാവങ്ങളിൽ ചിത്രീകരിച്ചിരിക്കുന്നു. പറന്നു വരുന്നതോ, നടന്ന് വരുന്നതോ പോലെ തോന്നുന്ന കുമ്മാട്ടി ഗ്രാമവീഥികൾക്ക് വിസ്മയഭംഗി പകരുന്നു. കാർഷികസമൃദ്ധിയും ഗ്രാമീണ ഐക്യവും വിളിച്ചോതുന്ന, ഓണത്തിന്റെ ആനന്ദ ചൈതന്യത്തെ ഉയർത്തിക്കാട്ടുന്ന കലാരൂപമാണ് കുമ്മാട്ടി.
Question 5.
കഥാപാത്ര നിരൂപണം തയ്യാറാക്കുക
പെയ്തു തീരാത്ത സ്വപ്നം പോലെ എന്ന കഥയിലെ സാറ എന്ന കൊച്ചു പെൺകുട്ടിയെ കുറിച്ച് കഥാപാത്രനിരൂപണം തയ്യാറാക്കുക.
Answer:
മജീദ് മജീദിയുടെ സ്വർഗത്തിലെ കുട്ടികൾ സിനിമയെ ആസ്പദമാക്കി എഴുതിയ പെയ്തുതീരാത്ത സ്വപ്നം പോലെ എന്ന കഥയിലെ സാറ, ദാരിദ്ര്യത്തിന്റെ വലയത്തിനുള്ളിൽ ജീവിക്കുന്ന ഒരു കൊച്ചു പെൺകുട്ടിയാണ്. കീറിയ ഷൂസ് നഷ്ടപ്പെട്ടപ്പോൾ പോലും വീട്ടിലെ സാമ്പത്തിക സ്ഥിതി മനസ്സിലാക്കി അത് അപ്പനോടോ അമ്മയോടോ പറയാതെ സഹോദരനോടൊപ്പം വേദന സഹിക്കുന്ന അവളുടെ സ്വഭാവം ഏറെ ഹൃദയസ്പർശിയാണ്. സഹോദരനോടുള്ള സ്നേഹവും ആത്മബന്ധവും അവളുടെ ഓരോ പ്രവൃത്തികളിലും തെളിഞ്ഞുനിൽക്കുന്നു. സ്കൂളിലേക്കുള്ള യാത്രയും ഷൂസ് പങ്കിട്ട് ഉപയോഗിക്കുന്ന അനുഭവവും അവളെ കൂടുതൽ കരുത്തുറ്റ കുട്ടിയായി തീർത്തു. അവളുടെ നഷ്ടപ്പെട്ട ഷൂസ് മറ്റൊരു പെൺകുട്ടിയുടെ കാലിൽ കണ്ടപ്പോൾ പോലും അവൾക്കു മാനക്കേട് വരാതിരിക്കാൻ ഒന്നും വെളിപ്പെടുത്താതെ സഹോദരനോടൊപ്പം മിണ്ടാതിരിക്കുകയായിരുന്നു. ഇതിലൂടെ അവളുടെ മനസ്സിലെ കരുണയും മാനുഷികതയും തെളിയുന്നു. ചെറുപ്പത്തിലേ കുടുംബത്തിന്റെ വേദനകളും കഷ്ടപ്പാടുകളും മനസ്സിലാക്കി സഹോദരനൊപ്പം അവയെ സഹിക്കാൻ തയ്യാറാവുന്ന മനോവികാസം അവൾക്കുണ്ട്. സാറയുടെ കണ്ണുനിറഞ്ഞ മൗനം പോലും വലിയൊരു സന്ദേശമായി മാറുന്നു. അവളുടെ നിരപരാധിത്വവും കാരുണ്യവും കഥയുടെ വികാരാത്മകത വർധിപ്പിക്കുന്നു. ജീവിതത്തിലെ ദുരിതങ്ങൾക്കിടയിലും പ്രതീക്ഷയും മനുഷ്യസ്നേഹവും കണ്ടെത്തുന്ന പ്രതീകമായി അവൾ മാറുന്നു. അതുകൊണ്ടുതന്നെ സാറ മലയാളപാഠഭാഗങ്ങളിലെ ഏറ്റവും ഓർമ്മിക്കപ്പെടുന്ന ബാലകഥാപാത്രങ്ങളിൽ ഒന്നാണ്.
Question 6.
പത്രവാർത്ത
ക്രിസ്റ്റി ബ്രൗണിന്റെ ചിത്രത്തിന് സമ്മാനം അർഹമായതിനെ തുടർന്ന് അവന്റെ വേറിട്ട കഴിവിനെ കാണിച്ചുകൊണ്ടുള്ള പത്രവാർത്ത തയ്യാറാക്കുക.
Answer:
കാൽവിരലിൽ വിരിഞ്ഞ കലാസൗന്ദര്യം : ക്രിസ്റ്റി ബ്രൗൺ ചിത്രരംഗത്തെ വിസ്മയിപ്പിച്ചു ഡബ്ലിൻ : സെറിബ്രൽ പാൾസി ബാധിച്ച് ശരീരചലനങ്ങൾ തളർന്നുപോയ ബാലനായ ക്രിസ്റ്റി ബ്രൗൺ തന്റെ ഇടതു കാൽവിരലിന്റെ സഹായത്തോടെ വരച്ച ചിത്രത്തിലൂടെ കലാരംഗത്ത് വിസ്മയം സൃഷ്ടിച്ചു. സൺഡേ ഇൻഡിപെൻഡന്റ് നടത്തിയ പെയിന്റിംഗ് മത്സരത്തിലാണ് ക്രിസ്റ്റിയുടെ ചിത്രം സമ്മാനാർഹമായത്. സിൻഡ്രല രാജകുമാരനോടൊപ്പം നൃത്തം ചെയ്യുന്ന ദൃശ്യത്തെ നിറപ്പകിട്ടോടെ ക്യാൻവാസിൽ പകർത്തിയ ക്രിസ്റ്റിയുടെ ചിത്രം സാധാരണ ചിത്രങ്ങളിൽ നിന്നും വ്യത്യസ്തമായ വികാര സമ്പന്നമായ ഭാവങ്ങളാൽ സമ്പുഷ്ടമായിരുന്നുവെന്ന് വിധികർത്താക്കൾ വിലയിരുത്തി.
ചിത്രം തിരഞ്ഞെടുക്കപ്പെട്ടുവെന്ന വാർത്ത അറിഞ്ഞപ്പോൾ ക്രിസ്റ്റിയുടെ കുടുംബവും സുഹൃത്തുക്കളും ആഹ്ളാദത്തിൽ മുങ്ങി. “ക്രിസ്റ്റിയുടെ ആത്മവിശ്വാസത്തിന്റെയും മനോവീര്യത്തിന്റെയും തെളിവാണ് ഈ വിജയം” എന്ന് സംഘാടകർ അഭിപ്രായപ്പെട്ടു.
ഇങ്ങനെ തന്റെ കാൽവിരലിൽ വിരിയിച്ച കലാസൃഷ്ടി ലോകത്തിനു മുന്നിൽ കൊണ്ടുവന്ന, ക്രിസ്റ്റി ബ്രൗൺ തന്റെ പ്രത്യേക കഴിവുകൊണ്ട് എല്ലാവർക്കും പ്രചോദനമായി മാറിയിരിക്കുന്നു.